გამყიდველის პოლიტიკა
ძალაშია 2026 წლის 21 ოქტომბრიდან. რედაქცია: 2026-10-21-v3.
ეს პოლიტიკა არეგულირებს Socmart-სა (შპს ტომსონს დიჯიტალ, იურიდიული მისამართი: საქართველო, ქ. ქუთაისი, ხუნდაძის ქ., N 52, ბ. N20, საიდენტიფიკაციო ნომერი: 412798110) და გამყიდველს შორის ურთიერთობას. მყიდველებისთვის მოქმედებს ცალკე დოკუმენტი: მომხმარებლის წესები და პირობები. გამყიდველად რეგისტრაციით ან პირველი განცხადების გამოქვეყნებით ეთანხმებით ამ პოლიტიკას.
1. Socmart-ის როლი და თქვენი როლი
თქვენ ხართ გამყიდველი. ნასყიდობის ხელშეკრულება იდება თქვენსა და მყიდველს შორის. Socmart არის პლატფორმის ოპერატორი. ჩვენ გთავაზობთ პლატფორმას, თქვენი სახელით ვიღებთ გადახდას (საგადახდო მომსახურების პროვაიდერ Keepz-ის მეშვეობით) და თანხას გადაგირიცხავთ, გაძლევთ საჩივრის არხს მყიდველთან კომუნიკაციისთვის და უზრუნველვყოფთ მყიდველისთვის თანხის დაბრუნებას. ნივთის საკურიერო მიტანასაც ჩვენ ვაორგანიზებთ: ჩვენ მიერ გამოძახებული კურიერი ნივთს თქვენგან იბარებს და მყიდველს მიუტანს.
თქვენ ანიჭებთ Socmart-ს უფლებამოსილებას: მიიღოს მყიდველის გადახდა თქვენი სახელით, გაუგზავნოს მყიდველს შეკვეთის დადასტურება თქვენი სახელით და, ამ პოლიტიკით გათვალისწინებულ შემთხვევებში, დაუბრუნოს მყიდველს თანხა თქვენთვის გადასარიცხი თანხიდან. მყიდველის მიერ Socmart-ისთვის გადახდილი თანხა თქვენთვის გადახდილად ითვლება და მყიდველის გადახდის ვალდებულება შესრულებულად მიიჩნევა.
Socmart არ არის გამყიდველი, არ ამოწმებს ნივთის ავთენტურობას, მდგომარეობას ან აღწერას და არ განსაზღვრავს ფასს. თქვენ არ უნდა შექმნათ შთაბეჭდილება, რომ ნივთს ყიდის Socmart, ან რომ ნივთს აქვს „Socmart-ის გარანტია“ ან ის „შემოწმებულია Socmart-ის მიერ“.
მყიდველი ყიდვამდე ხედავს, ვისგან ყიდულობს. ყველა გამყიდველის შემთხვევაში ჩანს სახელი და სტატუსი (კერძო პირი ან მოვაჭრე). მოვაჭრე გამყიდველის შემთხვევაში ჩანს სრული ინფორმაცია: სახელი ან სახელწოდება, სამართლებრივი ფორმა, საიდენტიფიკაციო ან სარეგისტრაციო ნომერი (ინდივიდუალური მეწარმისა და იურიდიული პირისთვის), იურიდიული მისამართი (მოვაჭრე ფიზიკური პირისთვის დეკლარაციაში მითითებული მისამართი) და ელფოსტა. მოვაჭრე ფიზიკური პირის პირადი ნომერი არასოდეს ჩანს. კერძო პირის შემთხვევაში ჩანს მხოლოდ სახელი და სტატუსი. თქვენი ტელეფონის ნომერი მყიდველისთვის არასოდეს ჩანს: მყიდველი გიკავშირდებათ Socmart-ის საჩივრის არხით (შეკვეთის გვერდიდან), ხოლო პასუხს თქვენ გასცემთ პლატფორმაზე (იხ. მე-15 თავი).
2. ვინ შეიძლება იყოს გამყიდველი
- გამყიდველი უნდა იყოს სრულწლოვანი (18 წლის ასაკს მიღწეული) და უნდა მართავდეს საკუთარ ანგარიშს ან ანგარიშს, რომლის მართვის უფლებამოსილებაც კანონიერად აქვს მინიჭებული.
- ერთ პირს შეიძლება ჰქონდეს არაუმეტეს 3 მაღაზიისა.
- გაყიდვის თანხა გადაგერიცხებათ მხოლოდ თქვენს სახელზე გახსნილ საბანკო ანგარიშზე (IBAN).
3. კერძო პირი და მოვაჭრე
რეგისტრაციისას გამყიდველის დეკლარაციაში სტატუსი განისაზღვრება შემდეგნაირად:
- ინდივიდუალური მეწარმე და იურიდიული პირი ყოველთვის მოვაჭრეა.
- თუ ფიზიკური პირი ხართ, პასუხობთ სამ კითხვას: (ა) „რეგულარულად ყიდი ნივთებს (მაგალითად, ყოველთვიურად ან უფრო ხშირად)?“; (ბ) „ყიდი ნივთებს, რომლებიც თავად დაამზადე?“; (გ) „ყიდულობ ნივთებს გადასაყიდად?“. თუ ერთ კითხვას მაინც დადებითად უპასუხეთ, მოვაჭრედ ითვლებით და ვალდებული ხართ, მიუთითოთ იურიდიული მისამართი, რომელიც მყიდველისთვის ყიდვამდე ჩანს. თუ ყველა პასუხი უარყოფითია, კერძო პირად ითვლებით. თქვენი პასუხები ინახება მათი გაცემის თარიღისა და დროის მითითებით.
სტატუსი კანონით განისაზღვრება და არა რეგისტრაციით. ფიზიკური პირიც შეიძლება მოვაჭრედ ჩაითვალოს, თუ ნივთებს რეგულარულად და მოგების მიზნით ყიდის: მაგალითად, ყიდის გადასაყიდად შეძენილ ან თავად დამზადებულ საქონელს, ერთი და იმავე სახის ნივთის მრავალ ერთეულს ან რეგულარულად ყიდის ნივთებს პირდაპირ ეთერში. გადამწყვეტია კონკრეტული გარემოებები, მათ შორის გაყიდვების სიხშირე; კანონი რიცხობრივ ზღვარს არ ადგენს.
ცრუ დეკლარაცია. რეგისტრაციისას მითითებული სტატუსის სისწორესა და ცრუ დეკლარაციით გამოწვეულ ზიანზე პასუხს თქვენ აგებთ.
Socmart-ს შეუძლია მოვაჭრედ მიგიჩნიოთ და სტატუსი შეგიცვალოთ, მათ შორის ავტომატურად, თუ ყიდით ერთი და იმავე ახალი ნივთის რამდენიმე ერთეულს; თქვენი გაყიდვების სიხშირე ან ბრუნვა კომერციულ საქმიანობაზე მიუთითებს; თქვენი გაყიდვების მოცულობა Keepz-ის მიერ დადგენილ ზღვარს აღწევს (3 000 ლარი); ან სხვა გარემოება მიუთითებს კომერციულ საქმიანობაზე. სტატუსის შეცვლის შესახებ გაცნობებთ; თუ არ ეთანხმებით, მიმართეთ მხარდაჭერის სამსახურს ელფოსტით და საკითხს ხელახლა განვიხილავთ.
შედეგი, თუ მოვაჭრე ხართ. თქვენს ყველა გაყიდვაზე (მეორად ნივთზეც) მყიდველს აქვს ხელშეკრულებაზე უარის თქმის 14-დღიანი უფლება. თქვენ გეკისრებათ ინფორმაციის მიწოდების ვალდებულება, ახალ ნივთზე კი ნაკლზე 2-წლიანი პასუხისმგებლობა; მეორად ნივთზე მოქმედებს ის ვადა, რომელიც განცხადებაში მიუთითეთ (იხ. 5.2 პუნქტი). მყიდველი თქვენთან განთავსებული შეკვეთის გვერდზე ხედავს ღილაკს „დაბრუნების მოთხოვნა“.
შედეგი, თუ კერძო პირი ხართ. ხელშეკრულებაზე უარის თქმის კანონისმიერი 14-დღიანი უფლება და ახალ ნივთზე 2-წლიანი პასუხისმგებლობა თქვენზე არ ვრცელდება, ხოლო მყიდველი თქვენთან განთავსებული შეკვეთის გვერდზე ღილაკს „დაბრუნების მოთხოვნა“ ვერ ხედავს. თქვენ მაინც ვალდებული ხართ: უზრუნველყოთ, რომ ნივთი შეესაბამებოდეს თქვენს აღწერასა და ფოტოებს; არ დამალოთ ცნობილი ნაკლი (ვრცელდება საქართველოს სამოქალაქო კოდექსით დადგენილი ნასყიდობის ზოგადი წესები); მყიდველის პრეტენზიას საჩივრის არხში უპასუხოთ 2 სამუშაო დღის ვადაში (იხ. მე-15 თავი). მყიდველი ყიდვამდე ხედავს, ვისგან ყიდულობს და რომელი წესები ვრცელდება შეძენაზე.
4. ვინაობის დადასტურება (KYC)
საგადახდო მომსახურების პროვაიდერი Keepz ამოწმებს გამყიდველის ვინაობას „ფულის გათეთრებისა და ტერორიზმის დაფინანსების აღკვეთის ხელშეწყობის შესახებ“ საქართველოს კანონის შესაბამისად. მოვაჭრე გამყიდველისთვის, მათ შორის ინდივიდუალური მეწარმისა და იურიდიული პირისთვის, ვინაობის დადასტურება (ვერიფიკაცია) უფრო ფართო მოცულობით ტარდება. კერძო პირის მონაცემები Keepz-ს გადაეცემა კვირაში ერთხელ, ინდივიდუალური მეწარმისა და იურიდიული პირის მიერ შევსებული სრული ფორმა კი მისი ყოველი წარდგენისას. ამ მიზნით Keepz-ს გადაეცემა თქვენი სახელი, პირადი ნომერი, ტელეფონის ნომერი და იმ ნივთების კატეგორიები, რომლებსაც ყიდით. თუ თქვენი გაყიდვების ჯამური მოცულობა (ყველა თქვენი მაღაზიის გაყიდვების ჯამი) საგადახდო მომსახურების პროვაიდერის მიერ დადგენილ ზღვარს აღწევს (3 000 ლარი), თანხის გადასარიცხად საჭიროა ვინაობის დამატებითი დადასტურება ბანკის ან პროვაიდერის მეშვეობით. ამის გამო გაყიდვა არ შეჩერდება, თუმცა ვინაობის დადასტურებამდე თანხის გადარიცხვა შეიძლება შეჩერდეს. მონაცემების Keepz-ისთვის გადაცემის შესახებ დაწვრილებით იხილეთ კონფიდენციალურობის პოლიტიკა.
5. განცხადების გამოქვეყნება
5.1. რა უნდა მიუთითოთ. დასახელება, აღწერა, ფასი (ლარში, ყველა გადასახადის ჩათვლით), ნივთის მდგომარეობა (ახალი ან მეორადი) და ფოტოები. ყველაფერი უნდა შეესაბამებოდეს რეალურ ნივთს. ფოტოზე უნდა იყოს გამოსახული თქვენი ნივთი და არა ინტერნეტიდან აღებული გამოსახულება.
5.2. მეორადი ნივთი. მეორადი ნივთის ცნობილი ნაკლი მიუთითეთ განცხადების ტექსტში და აჩვენეთ რეალურ ფოტოზე. მოვაჭრე გამყიდველისთვის ფარულ ნაკლზე პასუხისმგებლობის ვადა მეორად ნივთზე შეიძლება შემცირდეს მხოლოდ იმ შემთხვევაში, თუ შემცირებული ვადა განცხადებაში მკაფიოდ არის მითითებული და მყიდველი მას ყიდვამდე ხედავს. თუ ვადა განცხადებაში მითითებული არ არის, მეორად ნივთზეც მოქმედებს ახალი ნივთის 2-წლიანი ვადა. რაც უფრო მოკლეა ვადა, მით მეტია რისკი, რომ საქართველოს კონკურენციისა და მომხმარებლის დაცვის სააგენტომ ასეთი პირობა უსამართლო პირობად მიიჩნიოს. ზოგადი ჩანაწერი „ყველა მეორადი ნივთი იყიდება არსებულ მდგომარეობაში“ პასუხისმგებლობისგან გათავისუფლებთ მხოლოდ განცხადებაში მითითებული ნაკლისა და ჩვეულებრივი ცვეთის მიმართ და არა ისეთი ნაკლის მიმართ, რომელიც განცხადებაში არ ჩანს.
5.3. თითოეული განცხადების დასტური. ნივთის გამოქვეყნებამდე თითოეულ განცხადებაზე უნდა მონიშნოთ უჯრა: „ვადასტურებ, რომ ნივთი არ არის აკრძალული ან მოპარული, მეკუთვნის ან მაქვს მისი გაყიდვის უფლება, ხოლო აღწერა და ფოტოები სიმართლეს შეესაბამება.“ უჯრის მონიშვნის გარეშე განცხადებას ვერ გამოაქვეყნებთ. დასტური ინახება შესაბამისი ნივთის მონაცემებთან ერთად, გამოქვეყნების დროის მითითებით; ნივთის ახალ ნივთად კოპირებისას საჭიროა ხელახალი დასტური. უჯრის მონიშვნით ადასტურებთ, რომ:
- ნივთი მოპარული ან უკანონოდ მოპოვებული არ არის;
- ნივთი ნამდვილად ისეთია, როგორც აღწერილია და ფოტოებზეა ნაჩვენები;
- გაქვთ ამ ნივთის გაყიდვის უფლება;
- ნივთი არ არის აკრძალული Socmart-ზე (იხ. მე-6 თავი).
ცრუ დასტურის შედეგებზე პასუხს თქვენ აგებთ.
5.4. ფასი. ფასს ადგენთ თქვენ და ის უნდა მოიცავდეს ყველა გადასახადს: მყიდველი იხდის განცხადებაში მითითებულ ფასსა და მიტანის საფასურს, ხოლო ამ თანხას დამატებითი საკომისიო ან გადასახადი არ ემატება. თქვენ დამოუკიდებლად აგებთ პასუხს საკუთარი საგადასახადო ვალდებულებების შესრულებაზე.
5.5. 30 ლარამდე შეკვეთა. მოვაჭრე გამყიდველთან განთავსებულ შეკვეთაზე, რომლის ჯამური ფასი, მიტანის საფასურის გარეშე, 30 ლარს არ აღემატება, შეიძლება არ გავრცელდეს ხელშეკრულებაზე უარის თქმის კანონისმიერი წესები („მომხმარებლის უფლებების დაცვის შესახებ“ საქართველოს კანონის მე-10 მუხლის მე-3 პუნქტი). ზღვარი განისაზღვრება შეკვეთის ჯამური ღირებულების (ყველა ნივთის ფასის ჯამის) მიხედვით და არა თითოეული ნივთის ფასის მიხედვით. პლატფორმა ამას თავად ამოწმებს და ამის შესახებ მყიდველს ყიდვამდე ცხადად აცნობებს; თქვენგან დამატებითი მოქმედება არ მოითხოვება. ეს არ ეხება ნაკლიან ან აღწერასთან შეუსაბამო ნივთს.
6. აკრძალული ნივთები
აკრძალულია ნივთები, რომლებიც ჩამოთვლილია დოკუმენტში „რისი გაყიდვა არ შეიძლება Socmart-ზე“, და ყველაფერი, რისი გაყიდვაც კანონით აკრძალულია ან ნებართვას საჭიროებს.
საკვების გაყიდვა სრულად აკრძალულია. ეს ეხება ნებისმიერ საკვებსა და სასმელს, მათ შორის სახლში დამზადებულს. გამონაკლისი არ დაიშვება რეგისტრირებული ბიზნესოპერატორისთვისაც.
Socmart-ს შეუძლია ნებისმიერი განცხადება წაშალოს, დამალოს ან უარი თქვას მის გამოქვეყნებაზე. განცხადების შესახებ მყიდველისგან ან მესამე პირისგან მიღებულ შეტყობინებას განვიხილავთ და, საჭიროების შემთხვევაში, განცხადების ხელმისაწვდომობას შევზღუდავთ ან განცხადებას წავშლით.
7. AI-ით გენერირებული გამოსახულებები და ტექსტი
განცხადებაში დაშვებულია ხელოვნური ინტელექტის (AI) მეშვეობით გენერირებული გამოსახულება, მათ შორის მთავარ ფოტოდ, და AI-ის დახმარებით შექმნილი აღწერა. განცხადების გამოსაქვეყნებლად მაინც სავალდებულოა სულ მცირე ერთი რეალური ფოტო. AI-ით გენერირებულ გამოსახულებას ყოველთვის ახლავს აღნიშვნა „გენერირებულია ხელოვნური ინტელექტის მიერ, რეალური ფოტო არ არის“, რომლის მოხსნაც შეუძლებელია. განცხადების ბარათზე აღნიშვნა ჩანს ხატულისა და წარწერის „AI ილუსტრაცია“ სახით, ხოლო ბმულის გაზიარებისას იგივე წარწერა დატანილია ბმულის წინასწარი ხედის გამოსახულებაზეც.
თქვენ პასუხს აგებთ AI-ით შექმნილი გამოსახულებისა და ტექსტის სიზუსტეზე, ანუ რეალურ ნივთთან მათ შესაბამისობაზე. გამოქვეყნებამდე გადაამოწმეთ ისინი. თუ გამოსახულება ნივთს იმაზე უკეთესად წარმოაჩენს, ვიდრე ის სინამდვილეშია, ნივთის გამოსახულებასთან შეუსაბამობა ნაკლად ითვლება. ასეთი გამოსახულების გამოყენება შეიძლება შეცდომაში შემყვან კომერციულ პრაქტიკადაც ჩაითვალოს.
8. რედაქტირების შეზღუდვა და გაყიდვის მომენტის მონაცემების შენახვა
გაყიდვის მომენტში Socmart ინახავს იმას, რაც მყიდველმა ნახა: ფოტოებს, აღწერას, ფასს, ნივთის მდგომარეობასა და გამყიდველის ვინაობას. პირველი გაყიდვის შემდეგ განცხადების შინაარსის რედაქტირება აღარ არის შესაძლებელი. შინაარსის შესაცვლელად უნდა გამოაქვეყნოთ ახალი განცხადება: არსებული ნივთის ახალ ნივთად კოპირებით შეგიძლიათ შექმნათ ახალი ვერსია, ხოლო თავდაპირველი განცხადება უცვლელი რჩება. ფასის, მარაგისა და სტატუსის შეცვლა კი შეგიძლიათ. დავის განხილვისას მხედველობაში მიიღება ის, რაც მყიდველმა გადახდისას ნახა.
9. შეკვეთა და გაგზავნა
- შეტყობინება. შეკვეთის ღირებულების გადახდის შემდეგ გიგზავნით შეტყობინებას. შეკვეთა დადასტურებულად ითვლება და ვალდებული ხართ, შეასრულოთ იგი.
- გაუქმება. შეკვეთის გაუქმება შეგიძლიათ მხოლოდ იმ შემთხვევაში, თუ ნივთი ობიექტურად აღარ არსებობს ან დაზიანებულია. გაუქმების შემთხვევაში მყიდველს სრულად უბრუნდება თანხა, მიტანის საფასურის ჩათვლით. შეკვეთების ხშირი უსაფუძვლო გაუქმება შეიძლება ანგარიშის დაბლოკვის საფუძველი გახდეს.
- გაგზავნის ვადა. ნივთი უნდა შეფუთოთ და ჩვენ მიერ გამოძახებულ კურიერს გადასცეთ გადახდის დადასტურებიდან 2 სამუშაო დღის ვადაში (ორშაბათიდან პარასკევის ჩათვლით). ამ ვადას ჩვენ ვადგენთ; მისი შეცვლის შესახებ გაცნობებთ.
- შეფუთვა და მიტანა. ნივთი თავად და საიმედოდ უნდა შეფუთოთ. ნივთი მყიდველს მიეწოდება მხოლოდ საკურიერო მიტანით, Socmart-ის მეშვეობით: კურიერს (საკურიერო კომპანია Primedelivery) ჩვენ ვიძახებთ, კურიერი ნივთს თქვენგან იბარებს და მყიდველს მიუტანს, ხოლო გზავნილის თვალთვალის კოდს ჩვენ ვინახავთ. კურიერი ნივთის მდგომარეობას არ აფიქსირებს.
- მტკიცებულება. გირჩევთ, კურიერისთვის გადაცემამდე შეფუთულ ნივთს ფოტო გადაუღოთ და ეს ფოტო შეინახოთ: საჩივრის განხილვისას ის შეგიძლიათ მტკიცებულებად წარადგინოთ.
- დოკუმენტები. შეკვეთის დადასტურება და ქვითარი გაიცემა თქვენი სახელით („გამყიდველის სახელით, Socmart-ის მეშვეობით“). მოვაჭრის შემთხვევაში ამ დოკუმენტებში მითითებულია თქვენი სახელი ან სახელწოდება, საიდენტიფიკაციო ნომერი და მისამართი. თქვენ პასუხს აგებთ საკუთარი საგადასახადო ვალდებულებების შესრულებაზე.
10. ნივთის დაბრუნება, თანხის დაბრუნება და ნაკლი: რა ვალდებულებები გაქვთ
10.1. მოვაჭრე გამყიდველი. მყიდველს უფლება აქვს, 14 კალენდარული დღის ვადაში მიზეზის მითითების გარეშე უარი თქვას ხელშეკრულებაზე, მათ შორის მეორადი ნივთის შეძენისას. ვალდებული ხართ:
- მიიღოთ დაბრუნებული ნივთი;
- არ შეაჩეროთ თანხის დაბრუნება, სანამ ნივთს არ მიიღებთ: დაბრუნებულ ნივთს მყიდველისგან Socmart-ის მიერ გამოძახებული კურიერი იბარებს და თქვენ მოგიტანთ, ამიტომ თანხა მყიდველს უბრუნდება ხელშეკრულებაზე უარის თქმის შესახებ შეტყობინებიდან 14 დღის ვადაში, მიუხედავად იმისა, უკვე მიიღეთ თუ არა ნივთი (Socmart-ს შეუძლია თანხის დაბრუნება შეაჩეროს მხოლოდ მანამ, სანამ კურიერი ნივთს მყიდველისგან არ ჩაიბარებს);
- თუ ნივთს გამოყენების კვალი ეტყობა, ნივთის ღირებულების შემცირების ანაზღაურების მოთხოვნა დაასაბუთოთ მხოლოდ ფოტომტკიცებულებით (მტკიცების ტვირთი თქვენ გეკისრებათ).
10.2. კერძო პირი გამყიდველი. ხელშეკრულებაზე უარის თქმის კანონისმიერი 14-დღიანი უფლება არ მოქმედებს და Socmart ასეთ ვალდებულებას არ გაკისრებთ. მყიდველი თქვენთან განთავსებული შეკვეთის გვერდზე ღილაკს „დაბრუნების მოთხოვნა“ ვერ ხედავს და მის ნაცვლად საჩივრის არხს იყენებს (იხ. მე-15 თავი). თუ მყიდველთან ნივთის დაბრუნებაზე შეთანხმდებით, ეს თქვენი ნებაყოფლობითი გადაწყვეტილებაა.
10.3. 30 ლარამდე შეკვეთა. შეკვეთაზე, რომლის ჯამური ფასი (მიტანის საფასურის გარეშე) 30 ლარს არ აღემატება და რომელზეც პლატფორმამ მყიდველს ყიდვამდე ცხადად აცნობა, რომ უარის თქმის უფლება არ ვრცელდება, ხელშეკრულებაზე უარის თქმის წესები არ გამოიყენება (იხ. 5.5 პუნქტი). ნაკლთან დაკავშირებული უფლებები ძალაში რჩება.
10.4. ნაკლიანი ან აღწერასთან შეუსაბამო ნივთი. თქვენ პასუხს აგებთ ნივთის აღწერასთან შესაბამისობაზე. მყიდველს შეუძლია მოითხოვოს ნაკლის გამოსწორება, ნივთის შეცვლა, ფასის შემცირება ან ხელშეკრულების მოშლა და თანხის დაბრუნება. მოვაჭრის პასუხისმგებლობის ვადა ახალ ნივთზე 2 წელია, მეორად ნივთზე კი თქვენ მიერ განცხადებაში მითითებული ვადა (იხ. 5.2 პუნქტი). ივარაუდება, რომ მიწოდებიდან 6 თვის განმავლობაში გამოვლენილი ნაკლი მიწოდების მომენტში არსებობდა. კერძო პირს არ შეუძლია გამორიცხოს პასუხისმგებლობა ცნობილ და განზრახ დამალულ ნაკლზე. ეს უფლებები 30 ლარამდე შეკვეთაზეც ძალაში რჩება.
10.5. თანხას მყიდველს უბრუნებს Socmart. მყიდველისთვის თანხის დაბრუნებას უზრუნველვყოფთ ჩვენ (ვინაიდან მყიდველის მიერ გადახდილი თანხა ჩვენ მივიღეთ), ხოლო თქვენ ვალდებული ხართ, ეს თანხა აგვინაზღაუროთ (იხ. მე-13 თავი).
11. საკომისიო და გადახდები
- საკომისიო: გაყიდვის თანხის (ნივთის ფასის) 10%, რომელიც გამყიდველს ეკისრება. მყიდველის მიერ გადასახდელ ფასს საკომისიო არ ემატება. საკომისიო იკავება თქვენთვის გადასარიცხი თანხიდან. თუ მყიდველს ნივთის ფასი სრულად უბრუნდება, ამ გაყიდვაზე დაკავებული საკომისიო თქვენ გიბრუნდებათ (ნაწილობრივი დაბრუნებისას პროპორციულად).
- გადარიცხვის საფასური: საგადახდო მომსახურების პროვაიდერ Keepz-ის გადარიცხვის საფასური (0,50 ლარი თითო გადარიცხვაზე) ეკისრება გამყიდველს და არასოდეს ეკისრება მყიდველს. ის ცალკე ჩანს თქვენს ანგარიშში და გადასარიცხი თანხა შესაბამისად მცირდება. თუ რამდენიმე შეკვეთის თანხა ერთად გადაგერიცხებათ, საფასური ერთხელ გეკისრებათ.
- მაგალითი (ერთი შეკვეთის გადარიცხვა): ნივთის ფასი: 100 ლარი; საკომისიო: 10 ლარი; გადარიცხვის საფასური: 0,50 ლარი; თქვენ იღებთ 89,50 ლარს.
- მიტანის საფასური: მყიდველი მიტანის საფასურს (Socmart-ის საკურიერო ტარიფს) Socmart-ს უხდის. მიტანის საფასური თქვენთვის გადასარიცხ თანხაში არ შედის და კურიერს თქვენ არ უხდით.
- დოკუმენტი საკომისიოზე: Socmart საკუთარი სახელით დოკუმენტს გასცემს მხოლოდ საკუთარ საკომისიოზე. ყოველი გადარიცხვის პერიოდისთვის გიგზავნით საკომისიოს დამადასტურებელ დოკუმენტს (ინვოისს ან მიღება-ჩაბარების აქტს). ნივთზე დოკუმენტს თქვენი სახელით გასცემთ თქვენ.
- გადასახადები: თქვენ მიერ დადგენილი ფასი მოიცავს ყველა გადასახადს. თქვენ დამოუკიდებლად აგებთ პასუხს საკუთარი საგადასახადო ვალდებულებების შესრულებაზე. Socmart საგადასახადო კონსულტაციას არ გიწევთ.
12. თანხის გადარიცხვა თქვენთვის
გაყიდვის თანხა გადაგერიცხებათ რაც შეიძლება სწრაფად ნივთის ჩაბარების შემდეგ, ფიქსირებული შეკავების ვადის გარეშე: თანხა გადაირიცხება ჩაბარებისთანავე. შეკავების ვადას ადგენს Socmart და ის შეიძლება შეიცვალოს, მაგრამ ყოველთვის ნივთის ჩაბარებიდან ათვლილი ვადით და წინასწარი შეტყობინებით. თანხის საბანკო ანგარიშზე ასახვის ვადა დამოკიდებულია საგადახდო მომსახურების პროვაიდერისა და ბანკის სამუშაო დღეებზე. თანხა გადაგერიცხებათ, როცა გადასარიცხი თანხა პლატფორმაზე დადგენილ მინიმალურ ოდენობას აღწევს და ვინაობა დადასტურებულია.
სწრაფი გადარიცხვა არ ნიშნავს, რომ Socmart ვერ შეაჩერებს გადარიცხვას. Socmart-ს შეუძლია შეაჩეროს კონკრეტული თანხის გადარიცხვა მხოლოდ დასაბუთებული საფუძვლით და პროპორციულად, კერძოდ, თუ:
- მყიდველმა უარი თქვა ხელშეკრულებაზე ან ამ შეკვეთასთან დაკავშირებით მიმდინარეობს დავა ნაკლის ან ნივთის დაბრუნების გამო;
- არსებობს თაღლითობის ან გადახდის გასაჩივრების დასაბუთებული ეჭვი;
- ვინაობა დადასტურებული არ არის;
- გაქვთ დავალიანება Socmart-ის მიმართ.
დაუშვებელია გადარიცხვის უვადოდ ან წინასწარ განუსაზღვრელი ვადით შეჩერება: გაცნობებთ მიზეზსა და სავარაუდო ვადას, ხოლო შეჩერება გრძელდება მხოლოდ მანამ, სანამ მისი საფუძველი არსებობს.
13. თანხის დაბრუნების ვალდებულება, გაქვითვა და რეგრესი
თუ Socmart მყიდველს დაუბრუნებს თანხას თქვენს გაყიდვასთან დაკავშირებით (ხელშეკრულებაზე უარის თქმა, ნაკლი, აღწერასთან შეუსაბამობა, გაუქმება, გადახდის გასაჩივრება ან ნებისმიერი სხვა საფუძველი), თქვენ ვალდებული ხართ, ეს თანხა Socmart-ს აუნაზღაუროთ, მათ შორის მაშინაც, როცა გაყიდვის თანხა თქვენთვის უკვე გადარიცხულია. ამ მიზნით Socmart უფლებამოსილია:
- ეს თანხა გაქვითოს თქვენთვის მომავალში გადასარიცხ თანხებთან, რამაც შეიძლება თქვენი ბალანსი უარყოფითი გახადოს;
- მოგთხოვოთ თანხის ანაზღაურება მოთხოვნაში მითითებულ გონივრულ ვადაში;
- მოგთხოვოთ გადახდის გასაჩივრებასთან დაკავშირებით გაწეული ხარჯებისა და ზიანის ანაზღაურება (რეგრესი);
- საჭიროების შემთხვევაში შეგიჩეროთ ან დაგიბლოკოთ ანგარიში (იხ. მე-14 თავი).
ამ უფლებების მიზანია, რომ Socmart-ს ყოველთვის ჰქონდეს შესაძლებლობა, მყიდველისთვის დაბრუნებული თანხა თქვენგან აინაზღაუროს, მათ შორის იმ შემთხვევაში, თუ მყიდველის ან სააგენტოს წინაშე თანხის დაბრუნების ვალდებულება Socmart-ს დაეკისრება. გაქვითვა და მოთხოვნა მხოლოდ იმ თანხას ეხება, რომელიც მყიდველს რეალურად დაუბრუნდა ან დაუბრუნდება. თითოეული გაქვითვა და მოთხოვნა, მიზეზის მითითებით, ყოველთვის ჩანს თქვენს ანგარიშში.
14. შეჩერება, დაბლოკვა და გაუქმება
Socmart-ს შეუძლია განცხადება წაშალოს, ანგარიში შეაჩეროს ან დაბლოკოს, თუ:
- დაარღვიეთ ეს პოლიტიკა ან აკრძალული ნივთი გაყიდეთ;
- ხშირად ან უსაფუძვლოდ აუქმებთ შეკვეთებს;
- გაქვთ დავალიანება Socmart-ის მიმართ ან არ ანაზღაურებთ მყიდველისთვის დაბრუნებულ თანხას;
- არსებობს თაღლითობის, მოპარული ან ყალბი ნივთის გაყიდვის ეჭვი;
- სტატუსის ან ვინაობის შესახებ წარადგინეთ ცრუ დეკლარაცია;
- განმეორებით დაარღვიეთ მყიდველთა უფლებები.
მძიმე დარღვევის შემთხვევაში შეგვიძლია ამის შესახებ შევატყობინოთ შესაბამის უწყებას. ანგარიშის დაბლოკვისას გაუქმებული შეკვეთების თანხები მყიდველებს უბრუნდებათ, ხოლო ამ პოლიტიკით გათვალისწინებული გაქვითვის უფლება ძალაში რჩება. დაბლოკვის შემთხვევაში გაცნობებთ მის მიზეზს; თუ არ ეთანხმებით, მიმართეთ მხარდაჭერის სამსახურს ელფოსტით და გადაწყვეტილებას ხელახლა განვიხილავთ.
15. მყიდველთა პრეტენზიები
მყიდველი პრეტენზიას წარადგენს საჩივრის არხით, შეკვეთის გვერდიდან. პრეტენზიის შესახებ შეტყობინებას მიიღებთ გამყიდველის პანელში, ასევე SMS-ით ან ელფოსტით. ვალდებული ხართ, უპასუხოთ პლატფორმაზე, გამყიდველის პანელიდან, 2 სამუშაო დღის ვადაში. მყიდველი თქვენი პასუხის შესახებ შეტყობინებას იღებს SMS-ით ან ელფოსტით და პასუხს ხედავს თავისი შეკვეთის გვერდზე. თითოეულ შეკვეთაზე იქმნება ერთი მიმოწერა, რომელსაც მყიდველი აწარმოებს შეკვეთის გვერდიდან (ანგარიშში შესვლის შემდეგ), ხოლო თქვენ პასუხობთ პლატფორმაზე. Socmart-ის ადმინისტრაცია ყველა საჩივრის მიმოწერას ხედავს და საჭიროებისას ერთვება. თუ ვადაში არ უპასუხეთ, საკითხში ჩავერთვებით ჩვენ და შეგვიძლია გადავწყვიტოთ, რომ მყიდველს თანხა დაუბრუნდეს თქვენთვის გადასარიცხი თანხიდან. ვეხმარებით მხარეებს დავის მოგვარებაში, თუმცა დავის მხარე თქვენ ხართ.
16. მყიდველის პერსონალური მონაცემები: თქვენი ვალდებულებები
შეკვეთის შესასრულებლად ხედავთ მყიდველის სახელს, ტელეფონის ნომერსა და მისამართს. ეს მონაცემები შეგიძლიათ გამოიყენოთ მხოლოდ ამ შეკვეთის შესასრულებლად (შეფუთვა, კურიერისთვის გადაცემა, შეკვეთასთან დაკავშირებით მყიდველთან კომუნიკაცია). თქვენთვის გადაცემული მონაცემების ამ მიზნით დამუშავებაზე პასუხს თქვენ აგებთ, როგორც მონაცემთა დამმუშავებელი. აკრძალულია:
- მონაცემების გამოყენება სარეკლამო ან სხვა მიზნით და მათი გადაცემა მესამე პირისთვის (გარდა სისტემის მეშვეობით კურიერისთვის გადაცემისა);
- მონაცემების შენახვა შეკვეთის დასრულების შემდეგ უფრო დიდი ხნით, ვიდრე ამას კანონი მოითხოვს;
- მონაცემებზე უნებართვო წვდომის ან მათი გაჟონვის დაშვება (ასეთი ინციდენტის შესახებ დაუყოვნებლივ უნდა შეგვატყობინოთ).
გამყიდველის მონაცემები მყიდველისთვის ყიდვამდე ხელმისაწვდომია პირველ თავში აღწერილი მოცულობით (იხ. კონფიდენციალურობის პოლიტიკა).
17. რეკლამა
Socmart რეკლამას უწევს პლატფორმას და არა ცალკეულ განცხადებებს. განცხადების ბმულებს სოციალურ ქსელებში ავრცელებთ თქვენ და თქვენ მიერ გავრცელებულ შინაარსზე პასუხს თქვენ აგებთ.
18. რეფერალური პროგრამა და AI კრედიტები
თუ თქვენი რეფერალური ბმულით პლატფორმაზე სხვა გამყიდველს მოიწვევთ, პროგრამის პირობების შესაბამისად თქვენ და ახალი გამყიდველი მიიღებთ AI კრედიტებს, როცა ახალი გამყიდველის მაღაზიაში პირველი რეალური გაყიდვა შედგება. რეალურ გაყიდვად ითვლება რეალური მყიდველის მიერ გადახდილი შეკვეთა, რომელიც განთავსებული არ არის არც თქვენ მიერ და არც ახალი გამყიდველის მიერ. მომწვევ გამყიდველს ერიცხება 20 კრედიტი, ახალ გამყიდველს კი 5 კრედიტი. კრედიტების რაოდენობასა და თვეში გასაცემი ჯილდოების მაქსიმალურ რაოდენობას ადგენს Socmart, რომელსაც შეუძლია მათი შეცვლა.
კრედიტები არის ერთეულები, რომლებიც გამოიყენება პლატფორმის AI ფუნქციებისთვის (გამოსახულების გენერირება). მათ ფულადი ღირებულება არ აქვს; ისინი ფულზე არ გადაიცვლება, სხვა პირს არ გადაეცემა და არ ექვემდებარება ანაზღაურებას.
19. ხელშეკრულების შეწყვეტა
ანგარიშის დახურვა შეგიძლიათ ნებისმიერ დროს, თუ შესრულებული გაქვთ ყველა ვალდებულება (მათ შორის კურიერისთვის გადაცემული გაქვთ ყველა შეკვეთა, დასრულებულია ყველა დაბრუნება და დაფარულია დავალიანება Socmart-ის მიმართ). დახურვის შემდეგაც ძალაში რჩება თქვენი ვალდებულებები უკვე გაყიდულ ნივთებთან დაკავშირებით (ნაკლზე პასუხისმგებლობა, მყიდველისთვის დაბრუნებული თანხის ანაზღაურება, გაქვითვა). ასევე ინახება ის მონაცემები, რომელთა შენახვასაც კანონი მოითხოვს. Socmart-ს შეუძლია შეცვალოს ეს პოლიტიკა. ცვლილებას გამოვაქვეყნებთ და მივუთითებთ მისი ძალაში შესვლის თარიღს, ხოლო არსებითი ცვლილების შემთხვევაში ანგარიშში შესვლისას მოგთხოვთ, ხელახლა დაეთანხმოთ პოლიტიკას.
20. პასუხისმგებლობა და გამოსაყენებელი სამართალი
თქვენ პასუხს აგებთ განცხადების შინაარსზე, ნივთის კანონიერებასა და აღწერასთან შესაბამისობაზე. თუ თქვენს განცხადებასთან დაკავშირებით მესამე პირი Socmart-ს პრეტენზიას წაუყენებს, Socmart-ს აუნაზღაურებთ იმ ზიანს, რომლის ანაზღაურებაც კანონით თქვენ გეკისრებათ. ეს პოლიტიკა არ ზღუდავს მყიდველის კანონით დადგენილ უფლებებს. ამ პოლიტიკაზე ვრცელდება საქართველოს კანონმდებლობა. დავა თავდაპირველად მოლაპარაკების გზით უნდა გადაწყდეს; თუ შეთანხმება ვერ მიიღწევა, საქმეს განიხილავს საქართველოს კომპეტენტური სასამართლო კანონით დადგენილი წესით.
იხილეთ ასევე: მომხმარებლის წესები და პირობები, კონფიდენციალურობის პოლიტიკა, რისი გაყიდვა არ შეიძლება Socmart-ზე.